Вытворчасць малака ў Беларусі за пяць гадоў вырасла больш як на 10 працэнтаў. Аб гэтым паведаміў сёння журналістам міністр сельскай гаспадаркі і харчавання Іван Крупко на палях экспартнага форуму "Беларусь малочная", перадае карэспандэнт БЕЛТА.
"За апошняе пяцігоддзе ўдалося павялічыць аб'ём вытворчасці малака ў цэлым па краіне больш як на 10 працэнтаў. У 2020 годзе мы дасягнулі лічбы 7,8 млн т. Перспектывы відавочныя: па выніках года мы павялічым аб'ём вытворчасці на 100 тыс. т, а па выніках пяцігодкі плануем выйсці на лічбу 9,2 млн т", - сказаў Іван Крупко.
Ён падкрэсліў, што на знешніх рынках вялікі попыт на беларускую малочную прадукцыю. "Патрэбнасці ўнутранага рынку забяспечаны. Сёння мы робім усё магчымае для нарошчвання экспартнага патэнцыялу нашай краіны ў малочнай галіне. Прадпрыемствы працуюць стабільна і рэнтабельна. Зарабляюць сыравінныя зоны, перапрацоўка і нашы трэйдары, якія прадаюць малако на знешніх рынках. Мы стараемся разам з экспертамі выпрацаваць далейшую стратэгію беларускага экспарту ў малочнай вытворчасці", - адзначыў міністр.
Валавая вытворчасць малака ў Беларусі нарошчваецца за кошт максімальнай рэалізацыі патэнцыялу прадукцыйнасці кароў малочнага статка пры захаванні на працягу апошніх гадоў іх колькасці на ўзроўні 1,4 млн. Пяцітысячная мяжа ў прадукцыйнасці дойнага статка была пераадолена ў 2018 годзе, а ў 2020 годзе гэты паказчык склаў 5,3 тыс. кг малака з прыбаўкай да ўзроўню 2019 года 271 кг.
За 9 месяцаў бягучага года сярэдні надой малака ад каровы перасягнуў мінулагодні паказчык на 70 кг і склаў 4104 кг.
