01.08.2025

Герой Беларусі, першая беларуская жанчына-касманаўт Марына Васілеўская наведала Асіповічы

Герой Беларусі, першая беларуская жанчына-касманаўт Марына Васілеўская па запрашэнні камандзіра 51 гвардзейскай артылерыйскай брыгады гвардыі палкоўніка Аляксея Ратушнага наведала наш горад

Асіповічы сёння — гэта не толькі развіты прамысловы цэнтр, буйны транспартны вузел, але і важнае звяно ў сістэме нацыянальнай абароны, заслужана названы сталіцай беларускай артылерыі! І менавіта артылерыстамі напярэдадні Дня горада ў слаўную асіповіцкую гісторыю была ўпісана незвычайная, яркая старонка.

У ходзе візіту Марына Васілеўская азнаёмілася з жыццём ваеннага гарадка "Паўднёвы" і прайшла прысвячэнне ў артылерысты: на палігоне брыгады "Асіповіцкі" зрабіла стрэлы з самаходнай гарматы 2С5 "Гіяцынт" і гаўбіцы 2А65 "Мста-Б".

Марына Вітальеўна сустрэлася з выхаванцамі ваенна-патрыятычнага клуба "Гарнізон" пры 51 гвардзейскай артылерыйскай брыгадзе, наведала музей вайсковай часткі, у экспазіцыю якога перадала сцяг Беларусі, які пабываў з ёй на МКС у космасе, і зрабіла запіс у Кнізе ганаровых гасцей.

Пад глыбокім уражаннем ад убачанага Марына Васілеўская паабяцала прыехаць у наш горад яшчэ раз, але ўжо разам з Героем Расіі касманаўтам Алегам Навіцкім.

osipovichi-region.by