2 жніўня 2022
План 3 тысячы тон: у ААТ «Рассвет» імя К. П. Арлоўскага» Кіраўскага раёна збіраюць першы ўраджай яблыкаў
У кошык ідуць ранняспелыя плады гатунку «Жэнева Эрлі».
– Сабралі ўжо больш за дзве тоны, за тыдзень плануем яшчэ пяць, – расказвае галоўны тэхнолаг прамысловага саду Алена Юркавец. – Ранніх ўсяго будзе каля 15 тон, а ў цэлым яблычны ўраджай складзе 3 тысячы тон. Спачатку мы забяспечваем мясцовыя крамы Магілёўшчыны, а потым экспартуем. Летась 200 тон павезлі прама з саду, потым рэалізоўвалі ўжо са сховішча.
Усяго яблынь гатунку «Жэнева Эрлі» ў «Рассвеце» – 18 гектараў. Леташні ўраджай перавысіў трэць у агульным рэгіянальным паказчыку.