СТУДАТРАД ВІШОЎСКАЙ СШ ДАПАМОГ СВК “КАЛГАС “РАДЗІМА” САБРАЦЬ УРАДЖАЙ У САДЗЕ
Кожную восень пасля ўрокаў рабяты разам з педагогамі працуюць у садзе СВК “Калгас “Радзіма”, плошча якога дасягае 70 гектараў. За чатыры гадзіны збіраюць да 14 тон. І на гэты раз управіліся ў найкарацейшыя тэрміны, за старанні атрымаўшы прыемны матэрыяльны бонус.
Гэта самая вялікая сельская школа ў Бялыніцкім раёне: у ёй звыш двухсот хлопчыкаў і дзяўчынак з аграгарадка і 15 — з найбліжэйшых вёсак. Установа адукацыі плённа супрацоўнічае з гаспадаркай больш за дзесяць гадоў. Аграпрадпрыемства рэгулярна аказвае спонсарскую дапамогу на ўмацаванне матэрыяльнай базы школы, забяспечвае ўдосталь вітаміннай прадукцыяй. Вучням за добрую вучобу выплачвае стыпендыю, заахвочвае цікавымі паездкамі, а выпускнікам уручае каштоўныя падарункі. Вось і школьнікі заўсёды гатовы дапамагчы.
Штодзень пасля ўрокаў вучняў 7—11 класаў забіраў службовы аўтобус сельгаспрадпрыемства і дастаўляў у сад. Гэта пераважна хлопцы са студэнцкага атрада, які носіць імя ўраджэнкі раёна Героя Сацыялістычнай Працы Веры Буянавай.
Доўгі час кіруе студатрадам настаўнік гісторыі Уладзімір Чужаўка , які з гонарам адзначае, што вішаўскія школьнікі прывучаны да працы:
- Сельгаспрадпрыемству дапамагаем заўсёды. У студатрадзе вельмі мэтанакіраваныя падлеткі, сябры БРСМ, актывісты. Жадаючых заўсёды больш, чым месцаў. Часам даводзіцца нават кастынг уладкоўваць. Усе працуюць з агеньчыкам. У многіх хлопчыкаў і дзяўчынак бацькі таксама працуюць у гаспадарцы. Дарэчы, летам у нас быў лагер працы і адпачынку "Задорынка". Старшакласнікі дапамагалі на палях, у садзе, будбрыгадах.
Калі ў садах на прысядзібных участках яблыкаў асабліва не было, то ў гаспадарцы ўраджай парадаваў.
- Каб усё было па-чэснаму, у сшытку адзначаў вынік кожнага, - дзеліцца суразмоўца. - Калі хтосьці спачатку ленаваўся (хоць такое здараецца рэдка), рабіў пазнаку - матывуе. У сярэднім за дзень школьнікі зараблялі па 14 рублёў. Тыя, хто хадзіў увесь час, атрымалі каля 300 рублёў .
Асабліва дарагі рубель, зароблены асабіста, падкрэслівае дзесяцікласнік Дзмітрый Хімардзін . У 2023-м ён перавёўся ў Вішоўскую школу і адразу ж папрасіў запісаць яго ў студатрад - таксама захацеў стаць часткай дружнай каманды. Прызнаецца, што збор яблыкаў будзе ўспамінаць з настальгіяй і чакаць наступнага года:
- Здорава, што змог зарабіць першыя грошы і купіў падарунак маме на дзень нараджэння. І добрую справу зрабіў, і цікава правёў час. Дзякуй за такую магчымасць !
Спецыяліст СВК “Калгас “Радзіма” па дапаможных промыслах Малхасян Вагаршак задаволены памочнікамі і ўраджаем пладоў:
- Добра папрацавалі! Дзеці збіралі апалы яблыкі, якія пойдуць на прамперапрацоўку. У садзе ў нас прадстаўлены розныя гатункі беларускай селекцыі. На гэты раз рэкардсмен па ўраджайнасці - "алеся". На захоўванне плануем закласці як мінімум 220 тон, каля 300 - аддалі на перапрацоўку.
У камітэце па сельскай гаспадарцы і харчаванні аблвыканкама падкрэслілі: у рэгіёне сабрана больш за 7,7 тысячы тон яблыкаў, з іх 2,7 тысячы тон закладзена на захоўванне. Уборка працягваецца, актыўна дапамагаюць вяскоўцы. Гародніны атрымана больш за 82,2 працэнта. Валавы збор перавысіў 7,6 тысячы тон.