У Магілёўскай вобласці пачалася комплексная праверка органаў кіравання тэрытарыяльнай абароны
Адпаведнае распараджэнне ўручыў начальнік упраўлення тэрытарыяльнай абароны палкоўнік Андрэй Маціевіч кіраўніцтву Магілёўскага абласнога выканаўчага камітэта.
Першы этап праверкі пройдзе з 1 па 18 снежня. За гэты час плануецца ацаніць здольнасць выканаўчых камітэтаў вобласці ва ўстаноўленыя тэрміны сфарміраваць тэрытарыяльныя войскі ў трох адміністрацыйных раёнах, вызначыць гатоўнасць сфарміраваных штабоў раёнаў тэрытарыяльнай абароны і воінскіх часцей тэрытарыяльных войскаў выканаць вучэбна-баявыя задачы падчас камандна-штабнога вучэння, а таксама аказаць практычную дапамогу службовым асобам у рабоце па павышэнні якасці выканання пастаўленых задач.
«У адпаведнасці з дырэктывай начальніка генеральнага штаба прыступілі да фарміравання трох штабоў раёнаў тэрытарыяльнай абароны і трох батальёнаў тэрытарыяльных войскаў. Гэта праверка самая маштабная з моманту ўтварэння тэрытарыяльных войскаў. Прыцягненне такой вялікай колькасці правяраемых органаў кіравання тэрытарыяльных войскаў дазволіць максімальна аб’ектыўна ацаніць гатоўнасць і здольнасць мясцовых органаў улады сфарміраваць тэрытарыяльныя войскі і падрыхтаваць іх да выканання задач па прызначэнні, – сказаў Андрэй Маціевіч. – На завяршальным этапе комплекснай праверкі будзе праведзена камандна-штабнае вучэнне з прыцягненнем усіх органаў кіравання і тэрытарыяльных войскаў пад кіраўніцтвам намесніка губернатара Магілёўскай вобласці. Любая падсістэма бяспекі патрабуе пастаяннага ўдасканалення і развіцця. Менавіта для гэтага і праводзяцца такія праверкі».
Праверка праходзіць у адпаведнасці з планам падрыхтоўкі.