У новым навучальным годзе ў школы Магілёва прыйдзе больш за 41 тыс. навучэнцаў
У новым навучальным годзе ў школы Магілёва прыйдзе больш за 41 тыс. навучэнцаў. Пра гэта падчас пасяджэння Магілёўскага гарвыканкама паведаміла начальнік упраўлення па адукацыі гарвыканкама Ірына Рыбакова.
«У гэтым навучальным годзе за парты школ горада сядзе больш за 41 тыс. навучэнцаў. З іх больш за 4,5 тыс. – першакласнікі», – адзначыла начальнік упраўлення па адукацыі.
Ва ўстановы агульнай сярэдняй адукацыі Магілёва на свае першыя працоўныя месцы прыйшло 111 маладых спецыялістаў. «Сярод іх ёсць стыпендыяты спецыяльнага фонду Прэзідэнта па падтрымцы таленавітай моладзі, выпускнікі ВНУ з чырвонымі дыпломамі. Да нас прыйшлі прыгожыя, разумныя, таленавітыя і падрыхтаваныя маладыя людзі – змена прыйшла годная. Мы правялі вялікую сустрэчу з маладымі педагогамі, дзе кожны кіраўнік прадставіў сваіх маладых спецыялістаў. Абмеркавалі шмат важных пытанняў, у тым ліку, ці будзе ў іх класнае кіраўніцтва, вызначылі настаўнікаў, – адзначыла Ірына Рыбакова. – Да новага навучальнага года школы ўкамплектаваны кадрамі ў поўнай меры, недахопу няма. Гэта прафесійныя і кваліфікаваныя педагогі. Пры з’яўленні нейкіх пытанняў усё вырашаецца ў працоўным працэсе», – адзначыла яна.
Да навучальнага года ў горадзе правялі капітальны рамонт дзвюх школ у Кастрычніцкім раёне Магілёва – № 5 і № 13. Прыведзены ў парадак прылеглыя тэрыторыі і спартыўныя аб’екты. «Школы ўкамплектаваныя ўсім неабходным для забеспячэння якаснага адукацыйнага і выхаваўчага працэсаў. Атрыманыя ўсе сертыфікаты гатоўнасці», – падкрэсліла Ірына Рыбакова.
Старшыня Магілёўскага гарвыканкама Уладзімір Цумараў падкрэсліў падчас пасяджэння неабходнасць надаць пільную ўвагу прылеглым да ўстаноў адукацыі тэрыторыям. Даручыў адказным структурам праверыць працу вулічнага асвятлення і ўладкавання пешаходных пераходаў. Пры неабходнасці – прывесці ўсё ў парадак у самыя кароткія тэрміны.