Улетку ў Магілёўскай вобласці больш за 740 лагераў прымуць дзяцей на аздараўленне
У бягучым годзе з выкарыстаннем дзяржаўных сродкаў у Магілёўскай вобласці плануецца аздаравіць 44 тыс. дзяцей і падлеткаў, у тым ліку ў кругласутачных лагерах – 17,6 тыс. (з іх 2 354 – у спартыўна-аздараўленчых). Будзе арганізавана праца 743 лагераў– 178 кругласутачных (з іх – 16 стацыянарных) і 565 дзённых, паведамілі ў галоўным упраўленні па адукацыі аблвыканкама.
Суразмоўцы расказалі, што з мэтай прапаганды бяспечных і адказных паводзін сярод непаўналетніх у аздараўленчых лагерах і ўстановах адукацыі праводзіцца абласная прафілактычная акцыя «Жыццё цудоўнае! Думай! Беражы сябе!». На сістэмнай аснове працягваецца прафілактычная праца з улікам актуальнасці тэматыкі ў канкрэтны перыяд часу, а таксама становішча ў рэгіёне, у тым ліку ўмежах пяціхвілінак бяспекі. З улікам індывідуальных, узроставых і асобасных асаблівасцей дзяцей разбіраюцца пытанні захавання мер асабістай і грамадскай бяспекі з праверкай ведаў па правілах бяспечных паводзін у грамадскіх месцах, на вадаёмах, у побыце, у лесе, на дарогах і г. д.
У перыяд летняй аздараўленчай кампаніі па асобным графіку арганізавана наведванне педагогамі і навучэнцамі ўстаноў адукацыі вобласці Магілёўскага абласнога адукацыйнага цэнтра бяспекі, які размешчаны па адрасе: г.Магілёў, зав. Пажарны, д. 6. Праца з навучэнцамі ажыццяўляецца не ў форме сумных лекцый, а з выкарыстаннем тэхналогій дапоўненай рэальнасці па тэматычных блоках: у аснову навучання пакладзена віртуальнае апусканне навучэнцаў у асяроддзе, якое імітуе надзвычайную сітуацыю, і паглыбленае вывучэнне матэрыялу за кошт павышэння эмацыйнага ўспрымання мадэляванай абстаноўкі.
З мэтай належнай арганізацыі інфармацыйна-тлумачальнай работы ўстановамі адукацыі пастаянна праводзіцца работа па актуалізацыі прафілактычных матэрыялаў, размешчаных на інтэрнэт-рэсурсах устаноў адукацыі. Адпаведная інфармацыя даводзіцца ў класных (школьных) бацькоўскіх чатах з дапамогай рассылання праз Viber.
Асаблівая ўвага нададзена пытанням арганізацыі бяспекі непаўналетніх пры правядзенні ўрачыстых мерапрыемстваў «Выпускны вечар», якія адбудуцца 10 чэрвеня.
У мэтах якаснага правядзення летняй аздараўленчай кампаніі, эфектыўнай арганізацыі вольнага часу і працоўнай занятасці дзяцей і моладзі праведзена абарона рэгіянальных праграм занятасці навучэнцаў «Лета-2021», распрацаваных з улікам патрэб дзяцей і соцыуму. Так, для школьнікаў арганізавана работа студэнцкіх атрадаў, для старшакласнікаў–працоўных атрадаў, праца па дагаворах з упраўленнямі па працы, занятасці і сацыяльнай абароне гаррайвыканкамаў. Функцыянуюць вучнёўскія вытворчыя і сельскагаспадарчыя брыгады па рамонце школьнай мэблі, папраўцы падручнікаў, эстэтызацыі памяшканняў, добраўпарадкаванні тэрыторый. Школьнікі маюць магчымасць удзельнічаць у экспедыцыйных пошукавых групах, адправіцца ў турыстычныя паходы. Акрамя таго, для ўсіх навучэнцаў устаноў адукацыі вобласці забяспечана правядзенне спартыўна-масавай работы на базе дзіцяча-юнацкіх спартыўных школ, арганізавана работа школьных стадыёнаў і дзіцячых гульнявых пляцовак устаноў адукацыі.
«Усе непаўналетнія, асабліва ў дачыненні да якіх праводзіцца індывідуальная прафілактычная праца, якія знаходзяцца ў сацыяльна небяспечным становішчы, з катэгорыі дзяцей-сірот і дзяцей, якія засталіся без апекі бацькоў, уключаны ў арганізаваныя формы занятасці. З боку адміністрацыі ўстаноў адукацыі забяспечваецца кантроль за іх наведваннем», – канстатавалі суразмоўцы.
Магілёўскі абласны выканаўчы камітэт