Выставу тэатральных лялек можна ўбачыць у вокнах цэнтральнай бібліятэкі Магілёва
У Магілёве ў вокнах цэнтральнай гарадской бібліятэкі імя К.Маркса можна ўбачыць выставу-інсталяцыю «Дзіўны свет лялек», паведамілі ў абласным тэатры лялек.
Экспазіцыя стала часткай крэатыў-праекта «Арт-акно як аб'ект культурнай прасторы бібліятэкі». Над яе стварэннем працавалі супрацоўнікі вытворчай майстэрні тэатра: мастакі, скульптары, бутафоры, дэкаратары. Яны сабралі на адной выставачнай пляцоўцы больш за 50 лялечных акцёраў, кожны з якіх мае сваю індывідуальнасць і творчую гісторыю. Гэта персанажы з такіх папулярных спектакляў мінулых гадоў, як «Русалачка», «Асоль», «Карлік Нос», «Казка пра добрае Чарцяня» і іншых пастановак.
Экспазіцыя лялечных герояў дапоўнена тэматычнай літаратурай - дзіцячымі кнігамі для летняга чытання. Інсталяцыю можна паглядзець у вокнах бібліятэкі да 20 чэрвеня.