Дараганаўскі сельсавет
Дараганаўскі сельсавет размешчаны на паўднёвым захадзе ад горада Асіповічы. Ён з'яўляецца адной з самых заходніх адміністрацыйных адзінак Магілёўшчыны. Мяжуе з Пратасевіцкім, Дрычынскім, Карытненскім сельсаветамі Асіповіцкага раёна, з Завалочыцкім - Глускага, Новадарожскім - Старадарожскага і Суцінскім - Пухавіцкага раёнаў.
Плошча савета складае каля 60 км. кв., больш за 60% якой займаюць лясы.
населеных пунктаў - 14.
На працягу доўгай гісторыі землі сельсавета належалі Радзівілам, Вітгенштэйнам, Бокшам, Дараганам. Адміністрацыйна ўваходзілі ў склад Мінскай губерні, у Новадарожскую, Жыцінскую воласці Бабруйскага павета, затым - акругі. Пазней - у Старадарожскі, Слуцкі і, нарэшце, у Асіповіцкі раёны.
Цэнтрам сельсавета з'яўляецца вёска Дараганава, размешчаная на чыгуначнай лініі Асіповічы-Старыя Дарогі, за 17 км ад Асіповічаў, на левым беразе р. Пціч.
Заснавана як чыгуначная станцыя ў 1896 годзе памешчыкам Дараганам і названа ў яго гонар. У 1890 годзе ў пасёлку пражывала 1000 жыхароў, налічвалася 200 драўляных пабудоў, адна вінная і 10 бакалейных крам, лесапільны завод, паравы млын.
У 1917 годзе было адкрыта народнае вучылішча, у 1923 годзе - фельчарскі пункт.
З 1924 года Дараганава - цэнтр сельсавета Новадарожскай воласці Бабруйскага павета.
У 1926 годзе пачала працаваць хата-чытальня і школа-сямігодка (183 вучні).
На сённяшні дзень у пасёлку каля 175 двароў, функцыянуе чыгунка, АТС, электрастанцыя, аддзяленне паштовай сувязі, лясніцтва, вучэбна-педагагічны комплекс дзіцячы сад-школа, музычная школа, дом побыту, аптэка, участковая бальніца, бібліятэка, лазня, аддзяленне філіяла ААБ «Беларусбанк», дзве крамы.
Далёка за межамі раёна ведаюць Дараганаўскі краязнаўчы музей, які быў адкрыты ў 1983 годзе пры актыўным удзеле настаўніцы пачатковых класаў Зінаіды Рыгораўны Верашчакі, якая доўгі час узначальвала яго працу.
Ніводнае свята ў раёне не абыходзіцца без удзелу народнага ансамбля народнай песні «Вяселле» СВК «Калгас «Каўгарскі».
У Дараганаўскім лясніцтве працуе А.Г. Сямёнаў, шматразовы чэмпіён Рэспублікі Беларусь сярод лесарубаў, удзельнік міжнародных спаборніцтваў, якія праходзілі ў Аўстрыі, Нарвегіі і Шатландыі.
У 1976 годзе ўстаноўлены помнікі на брацкіх магілах савецкіх воінаў і партызан і брацкіх магілах ахвяр фашызму. 27 чэрвеня 2004 г. непадалёк ад в. Крынка ўсталяваны мемарыяльны знак у памяць аб расстраляных дзецях на месцы былога санаторыя «Крынкі».
Знакамітыя землякі: Г.М. Ліўшыц - доктар гістарычных і філасофскіх навук, заслужаны дзеяч навукі; А. М. Рамановіч - кандыдат філалагічных навук, лаўрэат Дзяржаўнай прэміі СССР, Дзяржаўнай прэміі Беларусі; П.А. Капітула -доктар эканамічных навук, прафесар; А.А. Дражнюк - кандыдат тэхнічных навук, сапраўдны дзяржаўны саветнік федэральнай службы геадэзіі і картаграфіі Расійскай Федэрацыі, старшыня рэдакцыйнай калегіі "Атлас свету", Г.П.Тварановіч (Сеўрук) - доктар філалагічных навук, паэтка.