Гады восьмай пяцігодкі сталі для Асіповічаў пачаткам новага этапа развіцця.
У сувязі з узятым XXIII з'ездам КПСС курсам на прамысловае будаўніцтва пераважна ў сярэдніх і невялікіх гарадах краіны было прынята рашэнне размясціць тут шэраг прадпрыемстваў саюзна-рэспубліканскага значэння. На развіццё гарадской гаспадаркі накіроўвалася ў 5 разоў больш сродкаў, чым у мінулыя пяць гадоў. Інстытутам "Белдзяржпраект" быў распрацаваны і ў 1966 годзе зацверджаны праект планіроўкі і забудовы горада, разлічаны да 1985 года.
У Асіповічах разгарнулася вялікае будаўніцтва. Акрамя млынавага камбіната будаваліся кардонна-рубероідны завод, завод жалезабетонных канструкцый, аўтарамонтныя майстэрні, прамысловая база СУ-89, аўтабаза. Уступілі ў строй сталярны цэх прамкамбіната, кансервавы цэх кансервава-харчовага камбіната. Гараджане атрымалі 12 343 квадратныя метры жылой плошчы - 325 добраўпарадкаваных кватэр. Акрамя таго, штогод з дапамогай дзяржавы ўзводзілася 140-150 дамоў індывідуальнымі забудоўшчыкамі. Пабудаваны таксама будынкі гарвыканкама і аддзяленні Дзяржбанка, супрацьсухотнага дыспансера, дзіцячых садоў-ясляў. Пачала дзейнічаць АТС.
У гады дзевятай пяцігодкі ў Асіповічах працягвалася хуткае развіццё прамысловасці.
Вясной 1974 года жыхары Асіповічаў устанавілі брацкія сувязі з балгарскім горадам Траўна. У чэрвені ў Балгарыю выехала дэлегацыя асіпаўчан, якую цёпла сустрэлі працоўныя Траўны. У Доме культуры адбыўся мітынг. Члены дэлегацыі наведалі шэраг прадпрыемстваў, пазнаёміліся з культурным жыццём і славутасцямі горада. Завяршылася сустрэча ўвечары сяброўства, на якім быў падпісаны дагавор аб сяброўстве і супрацоўніцтве Асіповічаў і Траўны. Яны сталі гарадамі-пабрацімамі. Гэта садзейнічала яшчэ большаму ўмацаванню сяброўскіх адносін, якія ўстанавіліся паміж працоўнымі Магілёўскай вобласці і Габроўскай акругі Народнай Рэспублікі Балгарыі.
Дзесятая пяцігодка стала для Асіповічаў перыядам новага росту. На развіццё гарадской гаспадаркі было накіравана больш за 33 млн. рублёў - у 1,5 раза больш, чым у дзявятым пяцігоддзі.
У строй дзеючых уступіла новае прадпрыемства — завод аўтамабільных агрэгатаў, якое ўключыла ў свой склад механазборачны цэх Мінскага аўтазавода. Пачалося ўзвядзенне новага будынка хлебазавода. Пасля рэканструкцыі ў 2 разы ўзрасла магутнасць камбікормавага цэха камбіната хлебапрадуктаў. Пры гэтым палепшылася якасць прадукцыі, у 2 разы павялічыўся выпуск яе ў гранулах, што значна скараціла страты пры транспарціроўцы. За ўкараненне перадавой тэхнікі і рацыяналізатарскую работу слесар-электрык В.М.Баразна, токар В.С.Доўнар, майстар пагрузкі В.М.Краснічэнка і начальнік камбікормавага цэха В.М.Жыдовіч былі ўзнагароджаны бронзавымі медалямі ВДНГ СССР.
У цэлым за гады 10-й пяцігодкі аб'ём прамысловай прадукцыі ў Асіповічах павялічыўся на 53,9 працэнта. 75 працэнтаў прыросту было атрымана за кошт павышэння прадукцыйнасці працы.
Асабліва значных працоўных поспехаў дабіўся кардонна-рубероідны завод. Па выніках Усесаюзнага сацыялістычнага спаборніцтва калектыў прадпрыемства ўзнагароджаны пераходным Чырвоным сцягам ЦК КПСС, Савета Міністраў СССР, НЦСПС і ЦК УЛКСМ, а таксама Памятным знакам ЦК КПСС, Савета Міністраў СССР, ВЦСПС і ЦК УЛКСМ "За высокую эфектыўнасць і якасць работы ў 10-й пяцігодцы. » з унясеннем на Усесаюзную дошку гонару на ВДНГ СССР.
