Папяровая фабрыка «Спартак» (г. Шклоў) рыхтуецца да запуску новага абсталявання, якое дазволіць павялічыць аб’ёмы перапрацоўкі макулатуры, як паведамілі ў канцэрне «Беллеспаперапрам».
Інвестыцыйны праект прадпрыемства рэалізуе пры падтрымцы Міністэрства жыллёва-камунальнай гаспадаркі. Ён накіраваны на вырашэнне важнай экалагічнай праблемы – перапрацоўкі адходаў паперы і кардону. Рэалізацыя праекта выгадная не толькі ЖКГ, але і самому перапрацоўшчыку. Паводле ацэнак, мадэрнізацыя абсталявання дазволіць павялічыць аб’ём перапрацоўкі другасных адходаў (нізкагатунковай макулатуры), якія ўтвараюцца ва ўсіх рэгіёнах Беларусі, у 3,5 разы – з 6,5 да 22,9 тысячы тон на год.
