Дарожную карту па развіцці супрацоўніцтва падпісалі Магілёўская вобласць і кітайская правінцыя Хэнань. Зацвярджэнне дакумента, подпісы пад якім паставілі намеснік старшыні Магілёўскага аблвыканкама Руслан Страхар і віцэ-губернатар правінцыі Хэнань Хэ Цзіньпін, адбылося сёння ў час анлайн-сустрэчы па міжрэгіянальным гандлёва-эканамічным супрацоўніцтве.
Як адзначыў Руслан Страхар, у дарожнай карце прапісаны асноўныя напрамкі, па якіх партнёры будуць развіваць супрацоўніцтва ў 2021–2023 гадах. Гэта культура і турызм, узаемны тавараабарот і інвестыцыйная сфера. З кожнага боку вызначаны адказныя выканаўцы мерапрыемстваў, канкрэтныя даты, па якіх будуць «звяраць гадзіннікі». Ужо ў найбліжэйшы час адбудзецца анлайн-сустрэча бізнес-колаў, дзе ацэняць дасягнутыя вынікі і вызначаць крокі па далейшым развіцці.
Намеснік старшыні аблвыканкама дадаў, што Магілёўская вобласць заўсёды надавала вялікую ўвагу развіццю супрацоўніцтва з КНР. Рэгіёнам устаноўлены партнёрскія ўзаемаадносіны з пяццю кітайскімі правінцыямі, што дае канкрэтныя вынікі. Толькі з 2015 года ўзаемны тавараабарот Прыдняпроўскага краю і Паднябеснай павялічыўся ў 13 разоў. На кітайскі рынак пастаўляюцца мяса птушкі, ялавічына, малочная прадукцыя, лён, лесаматэрыялы, мэбля, кандытарскія вырабы. І зараз галоўная задача –працягваць актыўнае ўзаемадзеянне, нягледзячы на пандэмію.
Дарэчы, менавіта правінцыя Хэнань стала адным з першых рэгіёнаў КНР, з якім Магілёўшчына ўстанавіла супрацоўніцтва ў лістападзе 2003 года. Прадпрыемствы вобласці аднымі з першых атрымалі дазвол упаўнаважаных кітайскіх органаў на экспарт малочнай і мясной прадукцыі ў Кітай і актыўна ўключыліся ў забеспячэнне кітайскіх правінцый высакаякаснымі прадуктамі харчавання.
«Мы ўпэўнены, што патэнцыял супрацоўніцтва велізарны, – падвярнуў Руслан Страхар. – У гандлёва-эканамічнай сферы неабходна пераходзіць ад простых продажаў да рэалізацыі сумесных інвестыцыйных праектаў. Вялікія, але пакуль дадатковыя рэзервы крыюцца ў сферы турызму. Як бачым з фільмаў, прырода і турыстычны патэнцыял нашых рэгіёнаў заслугоўвае асаблівай увагі, каб жыхары Магілёўскай вобласці і правінцыі Хэнань змаглі з імі пазнаёміцца. І вядома, важны абмен моладзевымі дэлегацыямі. Менавіта ім выбудоўваць партнёрскія адносіны ў будучыні. Я ўпэўнены, што падпісанне дарожнай карты стане важным крокам да далейшага ўмацавання нашага сяброўства».
У сваю чаргу, Хэ Цзіньпін пацвердзіў намеры ўмацоўваць супрацоўніцтва ва ўсіх сферах. Ён звярнуў увагу на неабходнасць больш актыўна задзейнічаць транспартныя і дарожныя магчымасці абедзвюх краін з перспектывай далейшай пабудовы эфектыўнай лагістычнай сеткі.
