Каля 2 тыс. навагодніх сувеніраў вырабяць да святаў майстры вытворчага навучання, выкладчыкі і навучэнцы Бабруйскага дзяржаўнага каледжа імя А. Я. Ларына. Пра гэта паведаміла намеснік дырэктара каледжа па вучэбна-вытворчай рабоце Людміла Стругава.
«Штогод у нашых вучэбна-вытворчых майстэрнях навучэнцы і работнікі вырабляюць навагоднія сувеніры з дрэва, гліны, паперы, пенапласту, тэкстылю, рукатворных дэкаратыўных элементаў, прыродных і падручных матэрыялаў, – адзначыла Людміла Стругава. – На ўроках вытворчага навучання, занятках у аб’яднаннях па інтарэсах можна ўбачыць займальны працэс стварэння ёлачных цацак у выглядзе шароў, сняжынак, гадзіннікаў, елак, канькоў, рукавіц, пацешных магнітаў з выявай сімвала 2021 года – бычка. Вырабляюцца і камплекты з дрэва «Лясная казка» (ёлка, снегавік, алені), сувеніры з керамікі: тут і Дзед Мароз, Снягурка, бычок, «пернікавая» карусель. Акрамя гэтага, у нашым каледжы робяць навагоднія паштоўкі».
Уся прадукцыя прадаецца ў краме на тэрыторыі каледжа. Таксама ўстанова адукацыі супрацоўнічае з некалькімі гандлёвымі кропкамі і індывідуальнымі прадпрымальнікамі ў горадзе. «Пакупнікоў прыцягвае невысокі кошт і арыгінальнасць нашых сувеніраў. Кожны год педагогі разам з дзецьмі імкнуцца прыдумаць нешта новае», – паведаміла намеснік дырэктара.
Сярод навінак – драўляныя ёлачныя ўпрыгожванні ў форме снегіроў і сінічак. Як расказала майстар вытворчага навучання Таццяна Ермакова, многія чэрпаюць ідэі з інтэрнэту. «Вядома, нешта падглядаем, але стараемся нават у гэтыя задумкі дадаць нешта сваё. Вось на адной скрыначцы знайшла малюнак сінічкі і снегіра. Вырашылі ўвасобіць іх у ёлачных цацках. Ідэя прыйшлася па гусце», – адзначыла яна.
У каледжы вучацца дзеці з усёй краіны, зараз іх тут амаль 600. Асвойваюць прафесіі выканаўцы мастацка-афарміцельскіх работ, вытворцы мастацкіх вырабаў з керамікі, сталяра і станочніка дрэваапрацоўчых станкоў, тэхніка-тэхнолага (тэхналогія і дызайн мэблі), выхавацеля дашкольнай адукацыі. Навучанне праходзіць як пасля 9-га, так і пасля 11-га класа.
