Карціны з выявай Айзека Азімава перададуць Клімавіцкаму краязнаўчаму музею. Пра гэта расказалі ў Агенцтве інтэграцыйных ініцыятыў (Смаленск, РФ).
На днях у Шумяцкім раёне Смаленскай вобласці на малой радзіме Айзека Азімава завяршыліся мерапрыемствы, прысвечаныя стагоддзю з дня нараджэння пісьменніка. Тут прайшлі традыцыйныя Азімаўскія чытанні, падчас якіх мастацка-краязнаўчы музей у Шумячах для Клімавіцкага раённага краязнаўчага музея перадаў карціны з выявай Айзека Азімава і яго сям’і. Аўтарам выяў стаў прафесар Смаленскага дзяржаўнага ўніверсітэта Аляксей Храмаў.
«Музей у Клімавічах абраны нездарма. Айзек Азімаў нарадзіўся ў 1920 годзе ў вёсцы Пятровічы. Тады гэты населены пункт уваходзіў у склад Клімавіцкага павета, а ўжо пазней стаў расійскай тэрыторыяй. Мы даведаліся, што ў Клімавічах цяпер няма экспазіцый, прысвечаных фантасту. І мы спадзяёмся, што перададзеныя карціны паслужаць адпраўным пунктам у афармленні новага выставачнага раздзела», – адзначылі арганізатары.
Прадстаўнікі Клімавіч не змаглі прысутнічаць на мерапрыемствах у Смаленскай вобласці, таму карціны перададуць у Беларусь крыху пазней.
«Карціны ўвойдуць у калекцыю нашага музея і зоймуць годнае месца ў ёй, – расказала галоўны захавальнік фондаў Клімавіцкага раённага краязнаўчага музея Наталля Банышэўская. – Нам яшчэ трэба будзе папрацаваць у гэтым кірунку, пашукаць гісторыю, якая звязвае знакамітага на ўвесь свет фантаста і Клімавіцкую зямлю».
Арганізатарам мерапрыемстваў выступіла агенцтва інтэграцыйных ініцыятыў пры падтрымцы Фонду прэзідэнцкіх грантаў РФ.
