Семінар «Лічбавізацыя дзяржаўных органаў і арганізацый з прымяненнем дзеючага заканадаўства. Інфармацыйная бяспека: ад тэорыі да практыкі» сабраў кіраўнікоў дзяржаўнага сектара Магілёўскай вобласці. У ролі спікераў-экспертаў выступілі прадстаўнікі Аператыўна-аналітычнага цэнтра пры Прэзідэнце Рэспублікі Беларусь, спецыялісты кампаніі beCloud і Нацыянальнага цэнтра інфармацыйных паслуг, прадстаўнікі ўпраўлення следчага камітэта і пракуратуры Магілёўскай вобласці.
Раней падобныя семінары ўжо прайшлі ў Гомелі, Брэсце і Гродне. У цэнтры ўвагі –пытанні лічбавізацыі дзяржсектара, развіцця лічбавай эканомікі краіны, забеспячэнне інфармацыйнай бяспекі інфармацыйных рэсурсаў і механізм пераходу дзяржорганаў у «Дзяржаўнае воблака». Гаворка ідзе пра інфармацыйна-тэлекамунікацыйную інфраструктуру, прававыя асновы якой закладзены Указам Прэзідэнта № 46. Аператарам па рэалізацыі праекта вызначана СТАА «Беларускія воблачныя тэхналогіі». Генеральны дырэктар Алег Сядзельнік удакладняе, якія выгады ад выкарыстання Рэспубліканскай воблачнай платформы атрымлівае дзяржава і арганізацыі:
– Сёння ўжо больш за паўтысячы дзяржаўных органаў і арганізацый ажыццяўляюць паэтапны пераход на выкарыстанне Рэспубліканскай воблачнай платформы. Сярод іх – Міністэрства па падатках і зборах, Міністэрства аховы здароўя, Міністэрства фінансаў, Міністэрства юстыцыі і іншыя. І ўжо можна сцвярджаць, што Рэспубліканская воблачная платформа дазваляе ўзмацніць узровень інфармацыйнай абароны ў дзяржаўных інфармацыйных сістэмах, забяспечыць абарону персанальных даных грамадзян, эканоміць бюджэтныя сродкі, супрацьдзейнічаць карупцыі пры закупцы абсталявання. Выдаткі на інфармацыйную бяспеку складаюць да 40% ад кошту інфармацыйных сістэм захоўвання, таму іх цэнтралізацыя на базе адной платформы дазволіць істотна эканоміць дзяржсродкі. Ключавое пытанне – максімальная бяспека захоўвання дзяржаўнай інфармацыі. У 2016 годзе быў уведзены ў эксплуатацыю Рэспубліканскі цэнтр апрацоўкі даных. І для таго каб даступна растлумачыць усе перавагі выкарыстання Рэспубліканскай воблачнай платформы, мы і праводзім такія сустрэчы ў рэгіёнах.
Семінар праходзіў у гібрыдным фармаце: у зале аблвыканкама сабралася нязначная частка ўдзельнікаў. Яшчэ каля чатырохсот удзельнікаў змаглі падключыцца да размовы з дапамогай воблачнай відэа-канферэнц-сувязі. Паміж удзельнікамі сеансаў воблачнай відэа-канферэнц-сувязі арганізуецца абмен аўдыя-і відэаінфармацыяй у рэжыме рэальнага часу, а таксама магчымасць сумеснай апрацоўкі інфармацыі. Гэта таксама паслуга рэспубліканскай платформы, якая можа выкарыстоўвацца, да прыкладу, для звароту грамадзян у дзяржорганы, пры правядзенні бацькоўскіх сходаў з улікам актуальнасці дыстанцыйных зносін ва ўмовах пандэміі.
Размова на семінары ішла і аб павышэнні эфектыўнасці працы дзяржсектара за кошт стварэння нацыянальнай SMART-платформы і перспектыў яе выкарыстання для патрэб разумнага горада.
На працягу трох дзён эксперты будуць сустракацца з прадстаўнікамі дзяржарганізацый вобласці, каб дапамагчы на месцах даць ацэнку ўзроўню лічбавізацыі і інфармацыйнай бяспекі.
