У Быхаве напярэдадні Вялікадня ў Дзіцячай школе мастацтваў і мастацкіх рамёстваў раённага цэнтра праходзіць майстар-клас па традыцыйным роспісе велікодных яек. Педагог Анжаліка Быстрова захапілася пісанкамі каля пяці гадоў таму, і за гэты час засвоіла некалькі тэхнік. Яе майстэрства ведаюць і за межамі раёна, бо яна распісвала вадкім жэмчугам дэкаратыўныя яйкі для велікоднай кампазіцыі ў падарунак Прэзідэнту. На майстар-класах па роспісе велікодных яек імкнуцца зацікавіць дзяцей, расказаць ім не толькі аб розных тэхніках, але і традыцыях і гісторыі свята. Дзеці ствараюць свае работы ў дзвюх тэхніках: у першай драўляныя нарыхтоўкі ў выглядзе яек афарбоўваюцца ў аднатонны колер, а потым на іх контурамі па шкле і кераміцы наносіцца кропкавы арнамент, у другой малюнак выконваецца з дапамогай растопленага воску і фарбавальнікаў - працэс не хуткі, але вынік апраўдвае затрачаныя сілы і час.
