Рэгіянальныя адборы да XXX Міжнароднага фестывалю мастацтваў «Славянскі базар у Віцебску» пройдуць у Беларусі з 12 лістапада па 11 снежня, як паведамілі ў Міністэрстве культуры.
Міністэрства культуры сумесна з Цэнтрам культуры «Віцебск» – дырэкцыяй Міжнароднага фестывалю мастацтваў «Славянскі базар у Віцебску», аблвыканкамамі, Мінскім гарвыканкамам вядуць падрыхтоўку да адборачных тураў XXX Міжнароднага конкурсу выканаўцаў эстраднай песні «Віцебск» і ХVIIІ Міжнароднага дзіцячага музычнага конкурсу «Віцебск». Стартавай пляцоўкай рэгіянальных адборачных тураў 12 лістапада стане Гомель. Эстафету працягне 18 лістапада Магілёў. Першы этап адборачных тураў завершыцца 11 снежня ў Брэсцкай вобласці.
У адборачным туры ў дзіцячым музычным конкурсе могуць удзельнічаць юныя беларусы ва ўзросце ад 8 да 14 гадоў. У адборы на конкурс выканаўцаў эстраднай песні заяўкі прымаюцца ад грамадзян не маладзейшых за 18 гадоў і не старэйшых за 31 год. Усе канкурсанты павінны мець вопыт канцэртных выступленняў і перамогі ў міжнародных або рэспубліканскіх музычных конкурсах і фестывалях.
Выканаўцам неабходна падрыхтаваць па дзве кампазіцыі: эстрадную песню беларускага аўтара на беларускай мове і эстрадную песню па выбары ўдзельніка, якая найбольш ярка адлюстроўвае яго выканальніцкае майстэрства і артыстычныя здольнасці (для ўдзельнікаў дзіцячага музычнага конкурсу), а таксама эстрадную песню кампазітара славянскай краіны на адной са славянскіх моў і сусветны хіт (для ўдзельнікаў конкурсу выканаўцаў эстраднай песні).
Для ўдзелу ў другім этапе адборачных тураў па выніках рэгіянальных адбораў выберуць да 5 удзельнікаў ад кожнай вобласці і Мінска.
