Ля помніка прыроды рэспубліканскага значэння «Блакітная крыніца» ў Слаўгарадскім раёне 13–15 жніўня адзначаць Мядовы Спас. Пра гэта паведамілі ў раённым выканаўчым камітэце.
Адкрые свята міжрэгіянальны велафестываль. Яго ўдзельнікі абмяркуюць перспектывы развіцця велатурызму ў Слаўгарадскім раёне падчас круглага стала, а таксама ажыццявяць велапаход па маршрутах: Блакітная крыніца –в. Крамянка –Блакітная крыніца і Блакітная крыніца –в. Благадаць –в. Дубна –Блакітная крыніца.
На тэрыторыі, прылеглай да Блакітнай крыніцы, разгорнецца выстава-продаж, якая будзе працаваць на працягу трох дзён. Госці свята змогуць набыць тут прадукцыю пчалярства, смачныя пачастункі ад мясцовых сыравараў, вырабы майстроў дэкаратыўна-прыкладной творчасці, харчовыя і прамысловыя тавары. Для дзяцей прывязуць атракцыёны, для дарослых арганізуюць пракат веласіпедаў і байдарак. У тых, хто цікавіцца гісторыяй знакамітага помніка прыроды, будзе магчымасць замовіць тэматычную экскурсію.
Увечары 13 жніўня вернікаў на Блакітнай крыніцы збярэ служба, дзе кожны зможа памаліцца, паспавядацца і папрасіць пра нешта сваё. Раніцай 14 жніўня ля капліцы адбудуцца малебныя спевы з акафістам, Боская літургія, хрэсны ход з асвятленнем вады, мёду, лекавых траў. Пасля ўсім жадаючым прапануюць здзейсніць абрад хрышчэння.
Акрамя рэлігійнага складніка, запланаваная культурная праграма. З нацыянальным каларытам абяцае прайсці VII рэгіянальнае свята-конкурс «Спас–усяму час». У ім прымуць удзел фальклорныя, вакальныя ансамблі Магілёўскай і іншых абласцей. Кампетэнтнае журы вызначыць найлепшых сярод калектываў і індывідуальных выканаўцаў народнай песні. На спецыяльнай пляцоўцы гасцей пазнаёмяць з інфармацыяй пра турыстычныя маршруты, аграсядзібы, мясцовыя фестывалі і святах.
Разыначкай трэцяга дня свята стане экаэтнафестываль «Песні пра крыніцы». Яго ўдзельнікі –вакальныя і інструментальныя калектывы – будуць выконваць кампазіцыі, звязаныя з тэматыкай вады.
«Нягледзячы на тое, што ў сучасным свеце многія традыцыі і святкаванні забытыя або страцілі сваю актуальнасць, свята Мядовага Спасу ў нас любяць і адзначаюць, імкнучыся ўзнавіць тыя традыцыі і абрады, якія прыйшлі ад продкаў, – расказалі ў райвыканкаме. – Штогод да Блакітнай крыніцы па самых сціплых падліках прыязджае да 50 тыс. паломнікаў. Вада тут лічыцца гаючай і з’яўляецца эталонам чысціні. Абрад жа пакланення крыніцы ўнесены ў спіс нематэрыяльнай культурнай спадчыны Беларусі».
На праваслаўнае свята «Макавей», прымеркаванае да Дня памяці сямі пакутнікаў Макавеяў і Мядовага Спасу, які адзначаецца 14 жніўня ля Блакітнай крыніцы, збіраецца асабліва многа людзей не толькі з Беларусі, але і Расіі, Украіны, іншых краін. Паводле павер’яў, неабходна прайсці праз крыніцу тры разы, набраць гаючай вады і акунуцца ў святой крыніцы. Робіцца гэта для таго, каб ачысціць душу і вылечыць цела ад хвароб.
