Абласны этап рэспубліканскай акцыі «Цуды на Каляды» прайшоў сёння ў сацыяльна-педагагічным цэнтры Кастрычніцкага раёна Магілёва. Павіншаваць дзяцей са святам прыехаў першы сакратар ЦК БРСМ, член Савета Рэспублікі Дзмітрый Варанюк.
«Саюз моладзі заўсёды ўдзельнічае ў дабрачынных праектах да Каляд і Новага года. Збіраем падарункі, выконваем жаданні дзяцей, якія па розных прычынах аказваюцца ў гэтыя святы без бацькоў. Вельмі важна надаць увагу гэтым дзеткам, наведаць іх, але ў цяперашніх рэаліях, безумоўна, пры выкананні ўсіх санітарна-эпідэміялагічных нормаў. Нават калі не атрымаецца з кімсьці сустрэцца, абавязкова перадамо ім падарункі і пажаданні шчаслівага Новага года», – адзначыў Дзмітрый Варанюк.
На сённяшні дзень у прытулку знаходзіцца 19 дзяцей ва ўзросце да 18 гадоў. Для іх арганізавалі чаяванне з прысмакамі і творчую праграму, у якой Дзед Мароз і Снягурка павіншавалі іх са святамі. Дзецям падарылі салодкія падарункі, цацкі і канцылярскія прыналежнасці.
«Валанцёры збіраюць падарункі ў гандлёвых цэнтрах, іншых масавых месцах. Гэта шмат да чаго абавязвае і выхоўвае: не забываць у гэтыя святы не толькі пра самых блізкіх, хто нам дарагі, але і пра тых, хто воляй выпадку можа аказацца ў святочныя дні адзін, не пашкадаваць часцінку дабра і падзяліцца цяплом з тымі, хто ў гэтым мае патрэбу, – падкрэсліў Дзмітрый Варанюк. – Гэта добрая і цудоўная акцыя. З часам яна набыла маштаб рэспубліканскай, а пачыналася са звычайнага праекта па ініцыятыве маладых валанцёраў. І мы будзем працягваць гэту працу».
