Турызм – адна з самых пацярпелых ад пандэміі кавід-19 галін. І ў Беларусі, і ва ўсім свеце. Але ўсё ж людзі задумваюцца аб тым, як пройдзе адпачынак у гэтым годзе, бо жыццё працягваецца.
Паводле апытванняў, 40% патэнцыйных турыстаў у найбліжэйшыя паўгода не збіраюцца нікуды ляцець, а таму, верагодна, нас чакае ўсплёск цікавасці да адпачынку ў родных краях.
Турфірмы Магілёўскай вобласці ў асноўным працуюць з канца сакавіка дыстанцыйна, заявак на туры не прымаюць, а толькі перабраніруюць тое, што было замоўлена раней. Зараз у рэгіёне каля сотні турарганізацый: іх паслугамі летась скарысталася больш за 120 тысяч чалавек. Амаль палова кліентаў – 55 тысяч – выехала адпачываць за мяжу. Ці выжывуць усе турфірмы на ўнутраным турызме – пакажа час.
На Магілёўшчыне сёння працуе больш за дзве сотні аб’ектаў аграэкатурызму. За год там пабывала больш за 50 тысяч чалавек, 9 з 10 гасцей – беларусы. Гаспадары сядзіб спадзяюцца, што іх пастаянныя госці з Расіі ўсё ж даедуць да нашых краёў.
