У Магілёўскай вобласці галіновы прафсаюз пералічыў з пачатку года ўстановам аховы здароўя рэгіёна Br13,3 тыс. спонсарскай дапамогі. Пра гэта паведамілі ў абласной арганізацыі прафсаюза работнікаў аховы здароўя.
Сродкі накіраваны на ўмацаванне матэрыяльна-тэхнічнай базы Шклоўскай цэнтральнай раённай бальніцы, абласной станцыі пералівання крыві, спецыялізаванага Дома дзіцяці, абласнога супрацьтуберкулёзнага дыспансера, абласных клінічнай і дзіцячай бальніц.
«У найбліжэйшы час таксама будзе аказана спонсарская дапамога Магілёўскай бальніцы хуткай медыцынскай дапамогі на суму Br2,1 тыс., – адзначылі ў абласным камітэце. – Грошы пойдуць на набыццё аквадыстылятара для выканання лабараторных аналізаў у сувязі з эпідэміялагічнай сітуацыяй, звязанай з COVID-19».
На аказанне матэрыяльнай дапамогі па працяглай хваробе за 9 месяцаў бягучага года з фонду дапамогі абласной арганізацыі галіновага прафсаюза накіравана Br4,8 тыс., таксама работнікам медустаноў вобласці на патанненне кошту пуцёвак у прафсаюзныя санаторыі выдзелена Br34 тыс. матэрыяльнай дапамогі.
