У Магілёўскай вобласці з’явіліся першыя экіпажы-трохтысячнікі, як паведамілі ў камітэце па сельскай гаспадарцы і харчаванні аблвыканкама.
Лідарства ў рэгіёне ўтрымлівае экіпаж камбайна «Нью Холанд» Бялыніцкага СВК «Калгас “Радзіма”». Паводле звестак на сённяшнюю раніцу, старшы камбайнер Мікалай Дарэчкін і яго памочнік Канстанцін Саладуха сабралі амаль 3089 т ураджаю. Гэта вышыня таксама скарылася сямейнаму экіпажу дваюрадных братоў Дрозд з ААТ «Рассвет імя К. П. Арлоўскага» Кіраўскага раёна, які ўжо намалаціў 3025 т. На адвозцы збожжа вызначыліся Алег Зайцаў з ААТ «Цішоўка» Магілёўскага раёна (перавёз 3082 т), Валерый Кавалёў з ААТ «Краснапольскі» аддз. Нарыманаўскае Краснапольскага раёна (3022 т), Сяргей Грамыка з ААТ «Горацкая райаграпрамтэхніка» Горацкага раёна (3009 т).
У цэлым у Магілёўскай вобласці па 1 тыс. т і больш збожжа новага ўраджаю намалацілі 257 экіпажаў камбайнераў, 2 тыс. т і больш – 10 экіпажаў.
На сушыльных агрэгатах няма роўных у вобласці брыгадзе з ААТ «Александрыйскае» Шклоўскага раёна ў складзе Канстанціна Гуштына, Дзяніса Пруднікава, Рамана Сапончыка, Сяргея Драгуна. На іх рахунку больш за 11,8 тыс. т высушанага збожжа.
Жніво ў рэгіёне ўжо праведзена на 83,5% пасеваў збожжавых і зернебабовых культур. Намалочана звыш 902 тыс. т збожжа, ураджайнасць склала 34,3 ц/га. У ліку лідараў на ўборцы – Кіраўскі раён, хлеб тут прыбралі на100% плошчаў. У Глускім раёне збожжа прыбрана на 98%, у Касцюковіцкім і Бабруйскім – на 96% і 95% адпаведна. Самы вялікі намалот – звыш 116 тыс. т – у Магілёўскага раёна. 100-тысячны рубеж перасягнуў Шклоўскі раён, дзе, дарэчы, і самая высокая ўраджайнасць – 46 ц/га.
Па ўраджайнасці сярод гаспадарак вобласці пальму першынства трымае ЗАТ «Агракамбінат “Зара”». Тут намалочваюць 57,8,6 ц/га. На другім месцы – СВК «Гігант» Бабруйскага раёна (56,6 ц/га), на трэцім – ААТ «Александрыйскае» Шклоўскага раёна (56 ц/га).
Усе работы ў Магілёўскай вобласці вядуцца ў комплексе, падкрэслілі ў камітэце. З палёў пасля жніва прыбіраюць салому, праводзяць узворванне, рыхтуюць глебу для сяўбы азімых культур. Разам са жнівом ідзе ўборка насеннікаў злакавых траў. Лён выцераблены на 83% плошчаў. У Горацкім, Мсціслаўскім, Хоцімскім, Чавускім раёнах заданне выканана цалкам, блізкія да гэтага льнаводы Магілёўскага раёна. Актыўна вядзецца абарочванне стужак і ўздым ільнотрасты. З кожнага гектара атрымана ў сярэднім па 4 цэнтнеры насення.
У той жа час актыўна працягваецца зялёнае жніво. Нарыхтавана больш за 122 тыс. т сена, гэта на 15 тыс. т больш за леташняе. Сенажу закладзена ў траншэі больш за 1714 тыс. т, у тым ліку зернесенажу – 33,7 тыс. т, сіласу – 61,9 тыс. т, кармоў у палімернай упакоўцы – звыш 100,5 тыс. т, што значна вышэй за леташняе.
У цэлым жа па вобласці ў наяўнасці 553 тыс. т кармавых адзінак, а гэта выходзіць па 14,39 цэнтнера кармавых адзінак на ўмоўную галаву жывёлы, не лічачы свіней і птушкі.
