Раённую паліклініку адкрылі сёння ў Мсціславе пасля маштабнай рэканструкцыі. Падзея для жыхароў горада і раёна значная, бо яе чакалі 3 гады. Будынак, узведзены ў 1984 годзе, у снежні 2017-га быў прызнаны аварыйным. Цяпер ад яго, ранейшага, засталіся толькі сцены.
Паводле слоў намесніка старшыні Магілёўскага аблвыканкама Валерыя Малашкі, які прысутнічаў на ўрачыстым адкрыцці абноўленай паліклінікі, кабінеты і тэхнічныя памяшканні ў ёй перапрафіляваныя і адпавядаюць сучасным медыцынскім патрабаванням: «Тут створаны ўсе ўмовы для камфортнай працы медыцынскага персаналу і прыёму пацыентаў. Самае галоўнае – сёння, калі мы на перадавой барацьбы з ковідам, мы можам падзяліць патокі пацыентаў і арганізаваць бяспеку людзей».
Паліклініка ў Мсціславе абслугоўвае 20 тысяч 200 чалавек, у тым ліку 9 тысяч 800 дзяцей. Разлічана на 375 наведванняў у змену. Капітальны рамонт старога трохпавярховага будынка, у якім расколіны папаўзлі па сценах і плітах перакрыцця і які ўжо нельга было эксплуатаваць, пачаўся ў красавіку 2019-га.
– Але ўжо ў снежні 2017-га нам (а паліклініка – гэта больш за 96 медработнікаў, уключаючы 22 дактароў, 60 кабінетаў) прыйшлося перасяліцца ў дзіцячае аддзяленне бальніцы, – удакладняе галоўны ўрач медустановы Наталля Філіпенка, якая працуе тут ужо 16 гадоў. – Там пацыентаў прымалі тэрапеўты і педыятры, у прыёмным аддзяленні – траўматолагі. Вядома, было некамфортна і дактарам, і хворым. Цесната, цесната... У сённяшняй складанай эпідэміялагічнай сітуацыі (а другая хваля каранавіруса Мсціслаўшчыну зачапіла мацней за першую), нам вельмі патрэбна была наша паліклініка.
З пацверджаным дыягназам «каранавірус» у іх, паводле слоў медыкаў, у стацыянары 27 землякоў, на амбулаторным лячэнні – 126. У аднаго з кабінетаў мы ўбачылі 53-гадовага Віктара Агароднікава з жонкай Верай. Разгаварыліся. Высветлілася, што на прыём да доктара яны прыехалі з вёскі Сапрынавічы. Галава сям’і адчуў слабасць, недамаганне, у яго паднялася тэмпература:
– У нас гасцявала дачка. Яна медык, працуе і жыве на Шклоўшчыне. Потым высветлілася, што ў яе – ковід... Вось і мы вырашылі праверыцца. Тым больш што ведалі: у гэты дзень адкрыецца абноўленая паліклініка, не будзе гармідару пад кабінетамі, як у прыстасаваным будынку.
Будынак паліклінікі абнавілі капітальна (штодня на аб’екце працавала каля 200 будаўнікоў): умацаваны падмурак і перакрыцці, замест цагляных сцен устаноўлены больш лёгкія – з аквапанеляў. Цалкам заменены інжынерныя сеткі, вентыляцыя, новая сістэма водацеплазабеспячэння. Для інвалідаў на ўваходзе і паверхах абсталяваны пандусы, у 3-павярховым будынку – новы зручны ліфт, а для слабавідушчых з’явілася спецыяльная тактыльная плітка, якая дапамагае ім арыентавацца.
– Паліклініка вельмі патрэбна раёну, у яе найхутчэйшай мадэрнізацыі мы былі вельмі зацікаўлены, і жыхары пастаянна звярталіся да нас з пытаннем, калі яе, абноўленую, адкрыюць, – падкрэслівае старшыня Мсціслаўскага райвыканкама Дзмітрый Пімашэнка. – А ўсяго на рамонт медустановы было выдаткавана каля 3 мільёнаў 200 тысяч рублёў з абласнога і раённага бюджэтаў.
Паводле слоў намесніка галоўнага ўрача паліклінікі Дзмітрыя Шарылава, на капрамонт скінуліся і спонсары, і самі землякі ўдзельнічалі ў суботніку. Агульнымі намаганнямі сабралі і пералічылі на рамонт больш за 30 тысяч рублёў.
У новай паліклініцы ўтульна, камфортна і светла. Кадрамі яна ўкамплектавана цалкам. Недахопу ў вузкіх спецыялістах няма. Малады спецыяліст Анастасія Андросава прыбыла сюды ў 2019-м па размеркаванні пасля Гродзенскага медыцынскага ВНУ. І яна, і яе муж Віталь працуюць педыятрамі:
– Я сама з Гродзеншчыны, спачатку думала пасля адпрацоўкі вярнуцца ў родны край. Але пасля таго як убачыла нашу паліклініку пасля рамонту, схіляюся да думкі, што наша сям’я застанецца ў Мсціславе.
Дарэчы, паліклініка ў Мсціславе – не першая капітальна абноўленая ў Магілёўскай вобласці. Сёлета пасля капрамонту раённыя паліклінікі адкрыліся ў Кіраўску, у Асіповічах. У Магілёве, у мікрараёне Казіміраўка, пабудавана новая. І гэта здаровая тэндэнцыя, паводле слоў начальніка галоўнага ўпраўлення па ахове здароўя Магілёўскага аблвыканкама Аляксандра Старавойтава, будзе працягнута:
– На чарзе – рэканструкцыя ўстановы аховы здароўя ў Слаўгарадзе, паліклінікі ў Крычаве, рамонт Чэрыкаўскай цэнтральнай раённай бальніцы.
