Папера замест пластыку. У Магілёўскай вобласці маюць намер перайсці на біяраскладальную ўпакоўку. У рэгіёне з’явіцца вытворча-складскі комплекс па вырабе тары і ўпакоўкі з гафракардону, як расказаў інспектар Магілёўскага абласнога камітэта прыродных рэсурсаў і аховы навакольнага асяроддзя Анатоль Бамбізаў.
Праект рэалізуецца ў межах інвестыцыйнага дагавора з картанажна-папяровай фабрыкай «Транспак». Мяркуецца, што на тэрыторыі Вяйнянскага сельсавета ўзвядуць вытворчы будынак і ўстановяць новае абсталяванне для вытворчасці гафратары і ўпакоўкі. У межах праекта закупяць дапаможнае абсталяванне, арганізуюць пад’язныя шляхі, спецыяльныя пляцоўкі для выгрузкі сыравіны і матэрыялаў, пабудуюць неабходныя камунікацыі.
«Таксама прапрацоўваецца магчымасць рэалізацыі інвестыцыйнага праекта па вытворчасці розных відаў паперы, якая выкарыстоўваецца для вырабу мяшэчных вырабаў для розных абласцей прамысловасці», – адзначыў Анатоль Бамбізаў. Эколагі кажуць, што рэалізацыя такога інвестпраекта на Магілёўшчыне дазволіць нарошчваць аб’ёмы папяровай упакоўкі. Гэта адпавядае сусветным тэндэнцыям у галіне экалогіі: краіны імкнуцца паступова адмаўляцца ад упакоўкі і посуду з пластыку.
Пакуль яшчэ ўласная вытворчасць біяраскладальнага посуду і ўпакоўкі не наладжана, прадпрыемствы грамадскага харчавання рэгіёна пачалі арыентавацца на закупку імпартнай папяровай тары. «У нас ёсць ужо раёны, дзе суб’екты гаспадарання вядуць працу па заключэнні дагавораў з вытворцамі-імпарцёрамі ўпаковачнай прадукцыі і аднаразовага посуду з паперы. У Клічаўскім, Клімавіцкім, Мсціслаўскім, Кіраўскім, Бялыніцкім, Чэрыкаўскім, Слаўгарадскім раёнах прадпрыемствыграмадскага харчавання вырабляюць закупку папяровага біяраскладальнага посуду», – дадаў Анатоль Бамбізаў.
