Намеснік старшыні Пастаяннай камісіі па бюджэце і фінансах Палаты прадстаўнікоў Пётр Вабішчэвіч расказаў журналістам аб навацыях Падатковага кодэкса Рэспублікі Беларусь, перадае карэспандэнт БЕЛТА.
Сёння ў Авальнай зале Дома ўрада прайшла сустрэча дэпутатаў Палаты прадстаўнікоў і членаў Савета Рэспублікі з прэм'ер-міністрам Раманам Галоўчанкам і членамі ўрада па разглядзе праектаў законаў Рэспублікі Беларусь "Аб рэспубліканскім бюджэце на 2024 год" і "Аб змяненні Падатковага кодэкса Рэспублікі Беларусь".
"Падатковы складнік павінен забяспечваць поўнае выкананне параметраў бюджэту. Для гэтага ў Падатковым кодэксе прадугледжаны розныя меры, якія закрануць як фізічных асоб, так і індывідуальных прадпрымальнікаў, а таксама юрыдычных асоб", - сказаў Пётр Вабішчэвіч.
Паводле яго слоў, даволі цікавыя навацыі ўводзяцца адносна падаходнага падатку, якія датычацца фізічных асоб. "Калі на працягу каляндарнага года сума даходу перавысіць Br200 тыс., то стаўка падаходнага падатку вырасце з 13 працэнтаў да 25 працэнтаў з сумы, якая перавышае Br200 тыс., - адзначыў дэпутат. - У адносінах да арганізацый усіх форм уласнасці будзе прыменена павышаная стаўка падатку на прыбытак у памеры 25 працэнтаў у выпадку перавышэння падатковай базы звыш Br25 млн. Чакаецца, што гэта мера дасць магчымасць дадаткова прыцягнуць у бюджэт краіны больш за Br200 млн".
"Ёсць пэўныя новаўвядзенні адносна транспартнага падатку. Калі для асноўнай катэгорыі нашых грамадзян будзе праведзена звычайная індэксацыя ставак транспартнага падатку (яна будзе ў межах да Br10), то для пэўнай катэгорыі ўладальнікаў аўто, якія маюць транспартныя сродкі павышанай камфортнасці, машыны прэміум-класа тэрмінам выпуску не большым за тры гады - стаўка падатку будзе павялічана ў 10 разоў. Паводле даных органаў рэгістрацыі, гаворка ідзе аб амаль 2 тыс. машын. Гэта невялікая колькасць машын, і асноўнай масы грамадзян гэта павышэнне не закране", - падкрэсліў Пётр Вабішчэвіч.
У той жа час будзе прыменены і атрымае практыку падатковы вылік па падаходным падатку для маладых людзей, якія прыбудуць на асноўнае месца работы пасля заканчэння вышэйшых, сярэдніх спецыяльных, прафесійных навучальных устаноў, у суме мінімальнай заработнай платы па краіне. "Гэта мера накіравана на тое, каб забяспечыць замацаванасць, даходнасць. І яна будзе дзейнічаць не больш за сем гадоў пасля прыходу на першае месца работы", - дадаў парламентарый.
