Кітайскія кампаніі ў 2,5 раза павялічылі закупкі піламатэрыялаў на Беларускай універсальнай таварнай біржы, паведамілі БЕЛТА ў прэс-службе БУТБ.
"Па выніках біржавых таргоў у студзені-ліпені 2023 года кітайскія кампаніі набылі на Беларускай універсальнай таварнай біржы больш як 195 тыс. куб.м піламатэрыялаў, што ў 2,5 раза больш, чым за той жа перыяд 2022 года. Пры гэтым 54 тыс. куб.м, або 28 працэнтаў ад агульнага аб'ёму, было рэалізавана з прымяненнем механізма адрасных здзелак, укаранёнага на БУТБ у чэрвені 2023-га з мэтай павышэння прывабнасці біржавога гандлю для замежных удзельнікаў", - расказалі ў БУТБ.
Такая статыстыка была агучана прадстаўнікамі БУТБ у час прэзентацыі магчымасцей беларускай біржавой пляцоўкі на міжнародным форуме па развіцці дрэваапрацоўчай галіны ў Тайцане (правінцыя Цзянсу, КНР). Мерапрыемства сабрала буйнейшых імпарцёраў лесапрадукцыі, якія выкарыстоўваюць кантэйнерны порт Тайцана для прыёмкі і перавалкі грузаў з усяго свету і ў тым ліку з Беларусі.
У час візіту ў Тайцан дэлегацыя біржы таксама правяла перагаворы з кіраўніцтвам кампаніі Taomu (Suzhou) Information Technology і наведала яе складскі комплекс. Гэта прадпрыемства мае статус брокера БУТБ у Кітаі і ў параўнанні са студзенем-ліпенем 2022 года амаль у 3 разы павялічыла закупкі беларускай пілапрадукцыі - з 28,9 тыс. куб.м да 81,2 тыс. куб.м.
Паводле інфармацыі БУТБ, рост цікавасці кітайскіх пакупнікоў да біржавога механізма звязаны з больш гібкай цэнавай палітыкай айчынных экспарцёраў, а таксама з дадатковымі сэрвісамі і гарантыямі, якія забяспечвае беларуская гандлёвая платформа.
"За доступ на ёмісты і плацежаздольны кітайскі рынак канкурыруюць пастаўшчыкі са многіх краін, і цэнавы фактар часта мае вызначальнае значэнне, асабліва на фоне слабага попыту з боку асноўных спажыўцоў - прадпрыемстваў будаўнічай галіны. Таму, каб умацаваць свае пазіцыі ў Кітаі, беларускія прадаўцы сталі больш ахвотна ісці на ўступкі пакупнікам, прапаноўваць больш зручныя ўмовы дастаўкі і аплаты. Больш таго, можна сказаць, што пры рабоце праз біржу пакупнікі з Паднябеснай карыстаюцца рэжымам аднаго акна, атрымліваючы тавар, лагістыку, разлікі ў юанях, кантроль выканання здзелак і кансультацыйную падтрымку на кітайскай мове. Усё гэта дапамагае прыцягваць на біржавыя таргі рэзідэнтаў КНР. У выніку цяпер у нас акрэдытавана 131 кампанія, гэта значыць на 30 больш, чым у пачатку года", - расказалі ў прэс-службе.
ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.
