Сума здзелак, заключаных расійскімі кампаніямі на Беларускай універсальнай таварнай біржы, у першым квартале 2023 года вырасла на 55 працэнтаў да аналагічнага перыяду мінулага года, пераадолеўшы парог $58 млн. Аб гэтым паведаміў начальнік упраўлення знешнеэканамічнай дзейнасці БУТБ Аляксандр Башлій у час пасяджэння Кузбаскай гандлёва-прамысловай палаты, прысвечанага асаблівасцям і перспектывам гандлю з краінамі СНД, якое прайшло ў рэжыме відэаканферэнцыі з удзелам прадстаўнікоў дзелавых колаў Кемераўскай вобласці Расіі, паведамілі БЕЛТА ў прэс-службе біржы.
Па выніках студзеня - сакавіка гэтага года Кемераўская вобласць упершыню выйшла на другое месца па суме біржавых здзелак сярод усіх суб'ектаў РФ, прадстаўленых на біржавой пляцоўцы. Больш высокі паказчык тавараабароту толькі ў Ленінградскай вобласці. "Драйверам росту сталі продажы кузбаскага вугалю для патрэб беларускіх прадпрыемстваў будаўнічай галіны. Агульная сума здзелак па гэтай таварнай пазіцыі склала $10,8 млн. Вядома, з улікам маштабаў вуглездабычы ў Кемераўскай вобласці лічба пакуль яшчэ сціплая, але так ці інакш гэта нядрэнны старт. Тым больш, што энергетычны вугаль карыстаецца стабільным попытам на біржавых таргах. Так, у 2022 годзе аб'ёмы яго біржавой рэалізацыі на ўнутраным рынку краіны склалі ў вартасным выражэнні $56,3 млн, а ў першым квартале 2023-га - $24,4 млн", - расказаў Аляксандр Башлій.
Пры гэтым, на думку прадстаўніка БУТБ, неабходна актывізаваць работу і па іншых таварных напрамках, якія маглі б даць штуршок далейшаму развіццю біржавога гандлю паміж Беларуссю і Кемераўскай вобласцю. "Беларускі біржавы рынак будзе, безумоўна, цікавы кузбаскім металавытворцам і металатрэйдарам, паколькі прадукцыя чорнай металургіі - адна з самых запатрабаваных груп тавараў на нашай гандлёвай платформе. Пры гэтым на працягу апошніх некалькіх гадоў дынаміка продажаў нязменна дадатная, а па выніках першага квартала 2023 года тэмп росту дасягнуў 126 працэнтаў. Калі ж гаварыць аб пастаўках беларускай прадукцыі ў Кемераўскую вобласць, то гэта розная тэхніка, запчасткі і камплектуючыя, шыны, тэкстыль, прадукты харчавання і іншыя несыравінныя тавары, якія можна набыць на біржавой пляцоўцы імпартазамяшчэння. Яна функцыянуе на базе біржы з чэрвеня 2022 года, і за гэты час паспела стаць папулярным інструментам закупак у беларускіх і расійскіх кампаній", - падкрэсліў начальнік упраўлення ЗЭД БУТБ.
ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.
