Пасол Беларусі ў Расіі Дзмітрый Крутой на чале беларускай дэлегацыі 30 кастрычніка наведаў з візітам Пензенскую вобласць. Аб тым, якія перспектыўныя напрамкі супрацоўніцтва абмеркавала дэлегацыя з кіраўніцтвам гэтага расійскага рэгіёна, пасол расказаў журналістам, паведамляе карэспандэнт БЕЛТА.
У час візіту адбылося пасяджэнне рабочай групы па супрацоўніцтве Беларусі і Пензенскай вобласці, якую з беларускага боку ўзначальвае старшыня Брэсцкага аблвыканкама Юрый Шулейка. На ім адзначалася, што апошні год Беларусь і Пензенская вобласць паказваюць рост узаемнага тавараабароту, аднак ён грунтуецца на нізкай базе ўзаемнага гандлю ў мінулыя гады. Таму бакі разглядаюць магчымасці новых кааперацыйных праектаў.
Сёння бакі могуць, па сутнасці, пахваліцца толькі адным кааперацыйным праектам: пензенская кампанія на базе шасі МАЗ займаецца выпускам аўтацыстэрнаў для прадпрыемстваў нафтахіміі. "Яго таксама плануем пашыраць. Але вось новая сфера - гэта станкабудаванне, дзе падпісана міжурадавае пагадненне і пастаўлена задача знайсці канкрэтныя праекты ў Беларусі і Расіі. Пералік прадпрыемстваў зразумелы, але пытанне ўзаемных паставак нейкіх камплектуючых, выхаду на фінальны, ужо саюзны выраб мае цяпер першараднае значэнне. Таму тэму станкабудавання плануем з Пензенскай вобласцю адпрацаваць вельмі падрабязна, таму што тут ужо ёсць адпаведны кластар, які падтрыманы губернатарам і развіваецца пад яго патранажам", - расказаў Дзмітрый Крутой.
Цікавы вопыт Пензенскай вобласці ў сферы імпартазамяшчэння. "У адрозненне ад іншых расійскіх рэгіёнаў, тут ужо ёсць канкрэтны пералік, зацверджаны губернатарам: у ім больш як 6 тыс. пазіцый, дзе ўдзельнічаюць ужо 27 прадпрыемстваў рэгіёна. І наша задача - знайсці вельмі хутка партнёраў у Беларусі, для гэтага будзем выкарыстоўваць інструменты гандлёва-прамысловых палат, нашай універсальнай таварнай біржы і нашага Банка развіцця", - растлумачыў пасол.
Паводле яго слоў, слаба развіта супрацоўніцтва ў сферы фармацэўтыкі, хоць у Пензенскай вобласці працуюць прадпрыемствы, якія ўваходзяць у 10 буйнейшых у Расіі. У час візіту губернатар Пензенскай вобласці Алег Мельнічэнка запрасіў беларускія фармацэўтычныя кампаніі да супрацоўніцтва не толькі ў сегменце непасрэдна лякарстваў, але і па стварэнні высокатэхналагічных медыцынскіх вырабаў.
Пасол таксама дадаў, што ў Беларусі і Пензенскай вобласці ёсць добрыя перспектывы супрацоўніцтва ў дрэваапрацоўцы, цэлюлозна-папяровай прамысловасці, у сферы АПК, у тым ліку па стварэнні саюзнага сучаснага буракаўборачнага камбайна.
У рамках візіту Дзмітрый Крутой наведаў групу кампаній "Даматэ", якая ўзначальвае рэйтынг буйнейшых вытворцаў індычкі ў Расіі і займае пятае месца па аб'ёмах вытворчасці ў свеце. Бакі дамовіліся аб устанаўленні кантактаў з Беларускай нацыянальнай біятэхналагічнай карпарацыяй: пензенскія вытворцы праявілі цікавасць да паставак прадукцыі БНБК.
