У Беларусі ў 2023 годзе газіфікавана каля 13 тыс. кватэр і домаўладанняў. Аб гэтым расказаў міністр энергетыкі Віктар Каранкевіч перад пачаткам падагульняючай калегіі міністэрства, перадае карэспандэнт БЕЛТА.
"У 2023 годзе газазабеспячальнымі арганізацыямі ўведзена ў эксплуатацыю каля 1 тыс. км газаправодаў розных катэгорый, газіфікавана прыродным газам каля 13 тыс. кватэр і домаўладанняў. Блакітнае паліва падведзена да 56 сельскіх населеных пунктаў, з іх 17 - аграгарадкі. Агульная працягласць газавых сетак склала больш як 67 тыс. км", - сказаў Віктар Каранкевіч.
Паводле яго слоў, газазабеспячальнымі арганізацыямі выкананы ўсе запланаваныя мерапрыемствы па тэхнічным пераўзбраенні і павышэнні якасці абслугоўвання аб'ектаў газаразмеркавальнай сістэмы. "Праведзена комплекснае прыборнае абследаванне 8,5 тыс. км падземных газаправодаў. Заменена 154 тыс. адзінак маральна ўстарэлага бытавога газавага абсталявання", - паведаміў міністр.
