Забароны і абмежаванні на наведванне лясоў уведзены ў 85 раёнах Беларусі, паведамляе БЕЛТА са спасылкай на аператыўную інфармацыю Міністэрства лясной гаспадаркі.
Больш за ўсё абмежаванні закранулі Мінскую і Магілёўскую вобласці. У кожным з гэтых рэгіёнаў абмежаваны для наведвання па 20 раёнаў. У Гродзенскай вобласці абмежаваны або забаронены для наведвання 17 раёнаў, Гомельскай - 16, Брэсцкай - 12. Віцебскую вобласць забароны і абмежаванні пакуль не закранулі.
Рашэнні аб увядзенні і зняцці забароны на наведванне лясоў прымаюць мясцовыя органы ўлады па хадайніцтве лесагаспадарчых устаноў або раённых аддзелаў па надзвычайных сітуацыях. Абмежаванні ўводзяцца ў выпадку высокага класа пажарнай небяспекі і здымаюцца пры стабілізацыі абстаноўкі. Галоўная мэта забароны - забяспечыць бяспеку грамадзян, захаванасць іх маёмасці, а таксама ляснога фонду.
На сайце Міністэрства лясной гаспадаркі размешчана інтэрактыўная карта забарон і абмежаванняў на наведванне лясоў. З яе дапамогай можна аператыўна прасачыць, у якіх рэгіёнах часова забаронена наведваць лясы.
