Сёння ў "Белдзяржхарчпрама" з Кітаем - больш за 30 дзеючых кантрактаў. Аб гэтым у інтэрв'ю карэспандэнту БЕЛТА расказаў старшыня канцэрна "Белдзяржхарчпрам" Алег Жыдкоў.
"Сёння з Кітаем у нас - больш за 30 дзеючых кантрактаў. На кітайскі рынак мы экспартуем практычна ўвесь асноўны асартымент выпускаемай прадукцыі: і рапсавы алей, і кандытарскія вырабы (шакалад, шакаладныя цукеркі, пячэнне), і моцныя алкагольныя напіткі, і пеністыя віны, некалькі гадоў запар пастаўлялі цукар. У 2022 годзе мы пашырылі асартыментны пералік экспартных тавараў: адгружаны першыя партыі фруктовага дзіцячага харчавання, аўсяных шматкоў", - сказаў Алег Жыдкоў.
Два флагманскія прадпрыемствы кандытарскай галіны СААТ "Камунарка" і СП ААТ "Спартак" ужо маюць прадстаўнікоў на тэрыторыі Кітая, што сведчыць аб узрастаючым попыце на беларускую прадукцыю як у кітайскага спажыўца, так і ў кітайскага бізнесу.
Паводле слоў старшыні канцэрна, большая частка Кітая - гэта еўропаарыентаванае насельніцтва з уласнай культурай, шматвяковымі традыцыямі і арыгінальнымі смакавымі густамі. "Таму перад намі як вытворцамі стаіць задача не толькі вырабіць якасны беларускі прадукт, які адпавядае дзяржаўнаму стандарту харчовай бяспекі КНР, але і адаптаваць яго пад смакавыя густы жыхароў Кітая", - акцэнтаваў увагу ён.
"Для вывучэння попыту і большага разумення кітайскага спажыўца да пандэмійнага 2020 года мы прымалі ўдзел ва ўсіх кітайскіх міжнародных выстаўках. У 2022 годзе наша прадукцыя была прадстаўлена на пятай Кітайскай міжнароднай выстаўцы імпарту ў Шанхаі. У рамках прэзентацый мы абавязкова праводзім дэгустацыю прадукцыі, каб патэнцыяльныя спажыўцы ацанілі смак і якасць нашых тавараў", - адзначыў кіраўнік "Белдзяржхарчпрама".
"Што датычыцца смакавых густаў, то нашы тэхнолагі заўсёды праводзяць аналіз мэтавай аўдыторыі і вывучаюць густы патэнцыяльных пакупнікоў. Перш чым выйсці на новы рынак, прыдумваем, што можна распрацаваць унікальнае. Дадаць перцу ў апельсінавы джэм або, напрыклад, цукеркі з паніжанай колькасцю цукру вырабіць - нашы прадпрыемствы гатовы да любых эксперыментаў", - падкрэсліў Алег Жыдкоў.
*** Поўны тэкст інтэрв'ю чытайце на стужцы навін і сайце БЕЛТА.
